റാഞ്ചല്‍ വിവാദം: ഇന്ന് തെളിവെടുപ്പും

കോ-പൈലറ്റ് ഉള്‍പ്പെടെ അന്ന് വിമാനത്തിലുണ്ടായിരുന്ന ജീവനക്കാരില്‍ നിന്നുമാണ് തെളിവെടുക്കുക. ....

തിരുവനന്തപുരം: തിരുവനന്തപുരത്ത് എയര്‍ ഇന്ത്യ വിമാനം റാഞ്ചാന്‍ യാത്രക്കാര്‍ ശ്രമിച്ചെന്ന പൈലറ്റിന്‍റെ പരാതിയുടെ അടിസ്ഥാനത്തില്‍ അന്ന് വിമാനത്തിലുണ്ടായിരുന്ന യാത്രക്കാരില്‍ നിന്നും തെളിവെടുപ്പ് ആരംഭിച്ചു. ശക്തമായ പ്രതിഷേധം ഉയര്‍ത്തിയ ആറ് യാത്രക്കാരെയാണ് ചോദ്യം ചെയ്യുന്നത്. വിമാനത്തില്‍ നടന്ന സംഭവങ്ങളെ കുറിച്ച് യാത്രക്കാരിന്‍ നിന്നും ചോദിച്ചറിയുന്നതിനായാണ് ഇവരെ വിളിച്ചു വരുത്തിയിട്ടുള്ളത്. സ്വാഭാവിക പ്രതിഷേധം മാത്രമാണ് തങ്ങളുടെ ഭാഗത്തു നിന്നും ഉണ്ടായിട്ടുള്ളതെന്ന് യാത്രക്കാര്‍ ആവര്‍ത്തിച്ചു.

ഇതിനിടെ പൈലറ്റിന്‍റെ പരാതിയുടെ അടിസ്ഥാനത്തില്‍ വിമാന ജീവനക്കാരില്‍ നിന്ന് ശംഖുമുഖം പൊലീസ് ഇന്ന് തെളിവെടുക്കും. കോ-പൈലറ്റ് ഉള്‍പ്പെടെ അന്ന് വിമാനത്തിലുണ്ടായിരുന്ന ജീവനക്കാരില്‍ നിന്നുമാണ് തെളിവെടുക്കുക. ജീവനക്കാരെ ഹാജറാക്കണമെന്ന് ആവശ്യപ്പെട്ട് എയര്‍ ഇന്ത്യക്ക് പൊലീസ് ഇന്നലെ നോട്ടീസ് നല്‍കിയിരുന്നു.

വിമാനം റാഞ്ചാന്‍ ശ്രമം എന്നുതന്നെയാണ് പൈലറ്റ് രൂപാലി പരാതി നല്‍കിയിട്ടുള്ളതെന്ന് വ്യക്തമായി. പൊലീസിനു നല്‍കിയ പരാതിയുടെ പകര്‍പ്പ് ഏഷ്യാനെറ്റ് ന്യൂസിന് ലഭിച്ചു. തിരുവനന്തപുരം വിമാനത്താവളത്തില്‍ നടന്ന സംഭവവികാസങ്ങള്‍ ദൗര്‍ഭാഗ്യകരമാണെന്നും യാത്രക്കാരെ ബുദ്ധിമുട്ടിക്കുന്ന സമീപനം ശരിയല്ലെന്നും ആഭ്യന്തര മന്ത്രി തിരുവ‌ഞ്ചൂര്‍ രാധാകൃഷ്ണന്‍ അഭിപ്രായപ്പെട്ടു.