പാക് പ്രധാനമന്ത്രിയെ അറസ്റ്റ് ചെയ്യില്ല

പാകിസ്ഥാന്‍ പ്രധാനമന്ത്രി രാജ പര്‍വേസ് അഷ്റഫിനെ അറസ്റ്റ് ചെയ്യാനുള്ള കോടതിവിധി നടപ്പാക്കില്ലെന്ന് അഴിമതി വിരുദ്ധ

ഇസ്ലാമാബാദ്: പാകിസ്ഥാന്‍ പ്രധാനമന്ത്രി രാജ പര്‍വേസ് അഷ്റഫിനെ അറസ്റ്റ് ചെയ്യാനുള്ള കോടതിവിധി നടപ്പാക്കില്ലെന്ന് അഴിമതി വിരുദ്ധ ഏജന്‍സി തലവന്‍ സുപ്രീംകോടതിയെ അറിയിച്ചു. പ്രധാനമന്ത്രിക്കെതിരായ അന്വേഷണത്തില്‍ പിഴവുകളുണ്ടെന്നും കൂടുതല്‍ പരിശോധനകള്‍ ആവശ്യമാണെന്നും ദേശീയ അക്കൗണ്ടബിളിറ്റി ബ്യൂറോ തലവന്‍ അഭിപ്രായപ്പെട്ടു. പാകിസ്ഥാന്‍ പ്രധാനമന്ത്രി രാജ പര്‍വേസ് അഷ്‍റഫിനെ അറസ്റ്റ് ചെയ്ത് ഹാജരാക്കാന്‍ സുപ്രീം കോടതി അനുവദിച്ച സമയം ഇന്നലെ അവസാനിച്ചിരുന്നു.

അഷ്റഫിനെതിരെ നടന്ന അന്വേഷണത്തില്‍ പോരായ്മകളുണ്ടെന്നും തെളിവുകള്‍ വിശ്വാസയോഗ്യമല്ലെന്ന് ദേശീയ അക്കൗണ്ടബിളിറ്റി ബ്യൂറോ തലവന്‍ ഫസിഹ് ബൊഖാരി കോടതിയെ അറിയിച്ചു. എന്നാല്‍ ബൊഖാരി പ്രതിഭാഗം അഭിഭാഷകനെപോലെയാണ് സംസാരിക്കുന്നതെന്ന് കോടതി അഭിപ്രായപ്പെട്ടു. ഒരു വര്‍ഷമായി  കോടതിക്ക് മുമ്പിലുള്ള കേസില്‍ ഇപ്പോള്‍ കൂടുതല്‍ സമയം ആവശ്യപ്പെടുന്നതിനെയും ചീഫ് ജസ്റ്റിസ് ഇഫ്തീകര്‍ ചൗധരി ചോദ്യം ചെയ്തു.

ഇതിനിടെ അഴിമതി വിരുദ്ധ പ്രക്ഷോഭം നടത്തുന്ന സുന്നി പുരോഹിതന്‍ തഹിരുള്‍ ഖദ്രിക്കെതിരെ സര്‍ക്കാര്‍ അറസ്റ്റ് വാറണ്ട് പുറപ്പെടുവിച്ചു. ആഭ്യന്തരമന്ത്രി റഹ്മാന്‍ മാലിക്കിന്‍റെ അനുമതിക്കായാണ് പൊലീസ് കാക്കുന്നത്. ഖദ്രിയുമായി ചര്‍ച്ച നടത്തി പ്രശ്നം പരിഹരിക്കുന്ന കാര്യവും പാകിസ്ഥാന്‍ സര്‍ക്കാരിന്‍റെ പരിഗണനയിലുണ്ട്.