ലങ്കയ്ക്കു മുന്നില്‍ ഓസീസ് നാണം കെട്ടു

ശ്രീലങ്കയ്ക്കെതിരായ മൂന്നാം ഏകദിന മത്സരത്തില്‍ വെറും 74 റണ്‍സിന് പുറത്തായ ഓസീസ്, ലങ്കയ്ക്ക് നാലു വിക്കറ്റ്...

ബ്രിസ്ബേന്‍: പേസ് കരുത്തുകൊണ്ട് എന്നും എതിരാളികളെ വിറപ്പിച്ചിട്ടുള്ള ഓസ്ട്രേലിയക്ക് അതേനാണയത്തില്‍ തിരിച്ചടി. ശ്രീലങ്കയ്ക്കെതിരായ മൂന്നാം ഏകദിന മത്സരത്തില്‍ വെറും 74 റണ്‍സിന് പുറത്തായ ഓസീസ്, ലങ്കയ്ക്ക് നാലു വിക്കറ്റ് വിജയം സമ്മാനിച്ചു. സ്കോര്‍: ഓസ്ട്രേലിയ: 26.4 ഓവറില്‍ 74ന് ഓള്‍ ഔട്ട്, ശ്രീലങ്ക: 20 ഓവറില്‍ 75/6. ജയത്തോടെ ശ്രീലങ്ക അഞ്ചു മത്സരങ്ങളുടെ ഏകദിന പരമ്പരയില്‍ 2-1ന് മുന്നിലെത്തി. കേവലം 26.4 ഓവറില്‍ ഓസീസ് ഇന്നിംഗ്സ് അവസാനിച്ചു.

22 റണ്‍സെടുത്ത മിച്ചല്‍ സ്റ്റാര്‍ക്കാണ് ഓസീസ് ഇന്നിംഗ്സിലെ ടോപ് സ്കോറര്‍. ഡോഹെര്‍ത്തി 15 റണ്‍സെടുത്തു. ഇരുവരും മാത്രമെ ഓസീസ് നിരിയില്‍ രണ്ടക്കം കടന്നുള്ളൂ. വാര്‍ണര്‍(4), ഹ്യൂസ്(3), ക്ലാര്‍ക്ക്(9), ഡേവിഡ് ഹസി(4), ജോര്‍ജ് ബെയ്ലി(0), മാത്യു വെയ്ഡ്(8), ഹെന്‍റിക്ക്(2), ജോണ്‍സണ്‍(2), മക്കായ്(0) എന്നിങ്ങനെയായിരുന്നു മറ്റു ഓസീസ് ബാറ്റ്സ്മാന്‍മാരുടെ സംഭാവന. 40/9 എന്ന നിലയില്‍ തകര്‍ന്ന ശേഷമായിരുന്നു അവസാന വിക്കറ്റില്‍ ഡോഹെര്‍ത്തി-സ്റ്റാര്‍ക്ക് സഖ്യം 34 റണ്‍സ് കൂട്ടിച്ചേത്ത് ഓസീസിനെ 74ലെത്തിച്ചത്. ലങ്കയ്ക്കായി കുലശേഖര അഞ്ചും മലിംഗ മൂന്നും വിക്കറ്റ് നേടി.

ചെറിയ വിജയലക്ഷ്യം തേടി മറുപടി ബാറ്റിംഗിനിറങ്ങിയ ലങ്കയ്കക് വിജയം എളുപ്പമായിരുന്നില്ല. തുടര്‍ച്ചയായ ഇടവേളകളില്‍ വിക്കറ്റുകള്‍ നഷ്ടമായ ലങ്കയെ ദില്‍ഷന്‍(22), കുശാല്‍ പെരേര(22), തരംഗ(12) എന്നിവരുടെ ഇന്നിംഗ്സാണ് തുണയായത്.