ഇനിയും കോടതി കയറ്റരുത്: മുഖ്യമന്ത്രിക്ക് വിതുര പെണ്‍കുട്ടിയുടെ കത്ത്

വിചാരണയുടെ പേരില്‍ ഇനിയും തന്നെ കോടതിയില്‍ കയറ്റരുതെന്ന് വിതുര പെണ്‍വാണിഭത്തില്‍ പീഡനത്തിരയായ പെണ്‍കുട്ടി. മുഖ്യമന്ത്രി...

തിരുവനന്തപുരം: വിചാരണയുടെ പേരില്‍ ഇനിയും തന്നെ കോടതിയില്‍ കയറ്റരുതെന്ന് വിതുര പെണ്‍വാണിഭത്തില്‍ പീഡനത്തിരയായ പെണ്‍കുട്ടി. മുഖ്യമന്ത്രി ഉമ്മന്‍ചാണ്ടിക്ക് അയച്ച കത്തിലാണ് വിതുര പെണ്‍കുട്ടി ഇക്കാര്യം വ്യക്തമാക്കിയിരിക്കുന്നത്.

വിചാരണയുടെ പേരില്‍ ഇനിയും കോടതിയിലേക്കില്ല. പതിനേഴ് വര്‍ഷമായി നീതി കിട്ടിയിട്ടില്ല. കേസുമായി മുന്നോട്ടു പോയാലും നീതി ലഭിക്കുമെന്ന് ഉറപ്പില്ല. ശിക്ഷ ലഭിച്ചാല്‍ പ്രതികള്‍ അപ്പീലിനു പോകും, തന്‍റെ കുഞ്ഞിന്‍റെ ഭാവിയാണ് പ്രധാനം.  കേസുമായി സര്‍ക്കാര്‍ മുന്നോട്ട് പോയാല്‍ ആത്മഹത്യ ചെയ്യേണ്ടി വരുമെന്നും തന്റെ അവസ്ഥ മനസിലാക്കണമെന്നും യുവതി പറയുന്നു. കോടതി കയറാനിടവരാതെ തന്നെ രക്ഷിക്കണമെന്നും യുവതി ഉമ്മന്‍ചാണ്ടിയോടു കത്തില്‍ ആവശ്യപ്പെടുന്നു.

വിതുര പീഡനക്കേസ് പരിഗണിക്കുന്ന കോടതി രണ്ടാംഘട്ട വാദം പൂര്‍ത്തിയാക്കി  കേസ് മാര്‍ച്ച് രണ്ടിലേക്ക് മാറ്റിയിരുന്നു. 1995ലാണ് കേസിനാസ്പദമായ സംഭവം. സംസ്ഥാനത്തിന്‍റെ വിവിധ സ്ഥലങ്ങളില്‍ പ്രായപൂര്‍ത്തിയാകാത്ത പെണ്‍കുട്ടിയെ എത്തിച്ച് പീഡിപ്പിച്ചുവെന്നാണ് കേസ്.