അധ്യാപക നിയമനം: ഓംപ്രകാശ് ചൗതാലയും മകനും അറസ്റ്റില്‍

ദില്ലി: മൂവായിരത്തോളം അധ്യാപകരുടെ നിയമനത്തില്‍ അഴിമതി കാണിച്ചുവെന്നാരോപിച്ച് ഹരിയാന മുന്‍മുഖ്യമന്ത്രി ഓംപ്രകാശ് ചൗതാലയെ അറസ്റ്റ് ചെയ്തു. മകന്‍ അജയ് ചൗതാലയെയും ഇതേ കേസില്‍ അറസ്റ്റിലായിട്ടുണ്ട്. കേസില്‍ ഇരുവരും കുറ്റക്കാരാണെന്ന് ദില്ലി കോടതി  കണ്ടെത്തിയതിനെത്തുടര്‍ന്നാണ് അറസ്റ്റുണ്ടായത്. ഇരുവരെയും ആറു ദിവസത്തെ പൊലീസ് കസ്റ്റഡിയില്‍ വിട്ടു. ഈ മാസം 22നാണ് ശിക്ഷ വിധിക്കുക. 2008ലാണ് സി ബി ഐ ചൗതാലക്കും മറ്റ് 54 പേര്‍ക്കുമെതിരെ അഴിമതിക്കുറ്റം ചുമത്തി റിപ്പോര്‍ട്ട് സമര്‍പ്പിച്ചത്. പ്രത്യേക സിബിഐ കോടതി ജഡ്ജി വിനോദ് കുമാറാണ് ചൗതാലയെയും മകനെയും റിമാന്‍ഡ് ചെയ്തത്. ആകെയുണ്ടായിരുന്ന 62 പ്രതികളില്‍ ആറുപേര്‍ അന്വേഷണം നടക്കുന്നതിനിടെ മരണപ്പെട്ടിരുന്നു. ഒരാളെ കോടതി വെറുതെവിട്ടിരുന്നു.