എയ്ഡഡ് പദവിക്കായി വാശിയില്ലെന്ന് ലീഗ്

കോഴിക്കോട്: മലബാറിലെ 33 സ്കൂളുകളുടെ എയ്ഡഡ് പദവി പ്രശ്നത്തില്‍ വാശി പിടിക്കാനില്ലെന്ന് മുസ്ലിം ലീഗ് വ്യക്തമാക്കി. അധ്യാപകരുടെ സേവനവേതന വ്യവസ്ഥകള്‍ ഉറപ്പാക്കുക മാത്രമാണ് ലക്ഷ്യമെന്നും ലീഗ് പ്രവര്‍ത്തക സമിതി യോഗത്തിന് ശേഷം ഇ ടി മുഹമ്മദ് ബഷീര്‍ അറിയിച്ചു. സുര്യനെല്ലി, എന്‍ എസ് എസ് വിവാദങ്ങളില്‍ ഇടപെടാന്‍ ലീഗില്ലെന്നും ഇ ടി മുഹമ്മദ് ബഷീര്‍ പറഞ്ഞു. സഹകരണ മേഖലയില്‍ സംഘടനാ പ്രവര്‍ത്തനങ്ങള്‍ ശക്തമാക്കാനും ലീഗിന്റെ വനിതാ സംഘത്തെ രംഗത്തു കൊണ്ടുവരാനും യോഗത്തില്‍ തീരുമാനമായി.

മലബാറിലെ 33 അണ്‍-എയ്ഡഡ് സ്കൂളുകള്‍ക്ക് എയ്ഡഡ് പദവി നല്‍കണമെന്ന് ഏറെക്കാലമായി ലീഗ് ആവശ്യമുന്നയിക്കുന്നുണ്ട്. എന്നാല്‍ ഈ ആവശ്യം മന്ത്രിസഭയും കെപിസിസിയും തള്ളിക്കളഞ്ഞിരുന്നു. പകരം ഈ സ്കൂളുകളിലെ അദ്ധ്യാപകര്‍ക്ക് മികച്ച സേവനവേതന വ്യവസ്ഥകള്‍ ഉറപ്പാക്കുമെന്ന് സര്‍ക്കാര്‍ പ്രഖ്യാപിച്ചിട്ടുണ്ട്. ഈ പശ്ചാത്തലത്തിലാണ് വിഷയത്തില്‍ കടുംപിടിത്തം വേണ്ടെന്ന് ലീഗ് യോഗത്തില്‍ തീരുമാനമായത്. സംഘടനാ സംവിധാനം ശക്തമാക്കാനും യോഗത്തില്‍ തീരുമാനമായിട്ടുണ്ട്. ഇതിനായി പ്രവര്‍ത്തക ക്യാമ്പുകള്‍ സംഘടിപ്പിക്കാനും ലീഗ് പ്രവര്‍ത്തക സമിതി യോഗം തീരുമാനിച്ചിട്ടുണ്ട്.