വാള്‍മാര്‍ട്ട് റിപ്പോര്‍ട്ടിനെക്കുറിച്ച് ജുഡീഷ്യല്‍ അന്വേഷണം

Last Updated on Wednesday, 12 December 2012 15:05

Published on Wednesday, 12 December 2012 12:34

ദില്ലി: ഇന്ത്യയില്‍ ചില്ലറ വ്യാപാരമേഖലയില്‍ വിദേശനിക്ഷേപം അനുവദിപ്പിക്കുന്നതിന് 150 കോടി രൂപ കോഴ നല്‍കിയെന്ന വാള്‍മാര്‍ട്ട് റിപ്പോര്‍ട്ടിനെക്കുറിച്ച് കേന്ദ്രസര്‍ക്കാര്‍ ജുഡീഷ്യല്‍ അന്വേഷണം പ്രഖ്യാപിച്ചു. പാര്‍ലമന്ററികാര്യമന്ത്രി കമല്‍നാഥ് ലോക്‌സഭയെ അറിയിച്ചതാണിത്. വിരമിച്ച ജഡ്ജിയ്ക്കായിരിക്കും അന്വേഷണ ചുമതല. അന്വേഷണം സമയബന്ധിതമായി പൂര്‍ത്തിയാക്കുമെന്നും കമല്‍നാഥ് അറിയിച്ചു.

അമേരിക്കന്‍ സെനറ്റ് മുമ്പാകെ നല്‍കിയ റിപ്പോര്‍ട്ടിലാണ് വിദേശനിക്ഷേപത്തിനായി 125 കോടി രൂപ ചെലവഴിച്ച കാര്യം വാള്‍മാര്‍ട്ട് വെളിപ്പെടുത്തിയത്. ഇത് ഇന്ത്യന്‍ പാര്‍ലമെന്‍റിനെ ഏറെ പ്രക്ഷുബ്ധമാക്കിയിരുന്നു. ഈ വിഷയത്തെചൊല്ലി കഴിഞ്ഞദിവസങ്ങളില്‍ പാര്‍ലമെന്‍റിന്‍റെ ഇരു സഭകളും പ്രതിപക്ഷകക്ഷികള്‍ സ്തംഭിപ്പിച്ചു.

വാള്‍മാര്‍ട്ടില്‍ നിന്ന് പണം ലഭിച്ചവരുടെ വിശദവിവരങ്ങള്‍ വെളിപ്പെടുത്തണമെന്നുമായിരുന്നു പ്രതിപക്ഷത്തിന്റെ ആവശ്യം. പാര്‍ലമെന്റിന്റെ സംയുക്തസമിതി രൂപവത്കരിച്ചുള്ള അന്വേഷണമോ ജുഡീഷ്യല്‍ അന്വേഷണമോ വേണമെന്ന് പ്രതിപക്ഷം ഒറ്റക്കെട്ടായി ആവശ്യപ്പെട്ടു.