സാമ്പത്തിക പരിഷ്ക്കാരത്തിന് അമേരിക്കന്‍ സെനറ്റ് അനുകൂലം

അമേരിക്കയെ ദീര്‍ഘനാളായി അലട്ടിക്കൊണ്ടിരിക്കുന്ന ഫിസ്കല്‍ ക്ലിഫ് പ്രശ്നത്തില്‍ സെനറ്റിന് അനുകൂലനിലപാട്. ഇതു സംബന്ധിച്ച

ന്യൂയോര്‍ക്ക്: അമേരിക്കയെ ദീര്‍ഘനാളായി അലട്ടിക്കൊണ്ടിരിക്കുന്ന ഫിസ്കല്‍ ക്ലിഫ് പ്രശ്നത്തില്‍ സെനറ്റിന് അനുകൂലനിലപാട്. ഇതു സംബന്ധിച്ച ബില്‍ അമേരിക്കന്‍ സെനറ്റില്‍ പാസായി. ഇനി റിപ്പബ്ളിക്കന്‍ കക്ഷിക്ക് ഭൂരിപക്ഷമുള്ള പ്രതിനിധിസഭയില്‍ ബില്‍ ചൊവ്വാഴ്ചയോ ബുധനാഴ്ചയോ വോട്ടിനിടും.

അമേരിക്കയില്‍ മാന്ദ്യമകറ്റാന്‍ നടപ്പാക്കിയ നികുതിയിളവുകളും പൊതുചെലവ് വര്‍ധനയും ഡിസംബര്‍ 31ന് അവസാനിച്ചിരുന്നു. ഇങ്ങനെ ചെയ്തപ്പോള്‍ ധനക്കമ്മി ക്രമാതാതീതമായി കൂടി. ധനക്കമ്മി കുറയ്ക്കാനായി നികുതികള്‍ വര്‍ധിപ്പിക്കേണ്ടി വരും. ഇതാണ് ഫിസ്കല്‍ ക്ലിഫ് എന്നറിയപ്പെടുന്നത്. ഇക്കാര്യത്തില്‍ ഒബാമ നിര്‍ദ്ദേശിക്കുന്ന നികുതിവര്‍ധന റിപ്പബ്ളിക്കന്മാര്‍ക്ക് സ്വീകാര്യമായിരുന്നില്ല. റിപ്പബ്ളിക്കന്‍ കക്ഷിയുടെ നിര്‍ദ്ദേശം ഡമോക്രാറ്റുകളും അംഗീകരിച്ചിരുന്നില്ല. ഈ പശ്ചാത്തലത്തിലാണ് സമവായത്തിന്‍റെ സൂചനകള്‍ നല്‍കി സെനറ്റില്‍ ബില്‍ പാസായിരിക്കുന്നത്.

അടിയന്തിരമായി നടപടികള്‍ സ്വീകരിച്ചില്ലെങ്കില്‍ അമേരിക്ക വീണ്ടും മാന്ദ്യത്തിലേക്ക് നീങ്ങുമെന്ന് സാമ്പത്തികവിദഗ്ധര്‍ മുന്നറിയിപ്പ് നല്‍കിയിരുന്നു. പുതിയ പദ്ധതിയനുസരിച്ച് മധ്യവര്‍ഗത്തിന് നിലവിലുള്ള നികുതികളില്‍ മാറ്റമുണ്ടാവില്ല. നാലു ലക്ഷം ഡോളറിന് മുകളില്‍ വാര്‍ഷികവരുമാനമുള്ള വ്യക്തികളും നാലരലക്ഷം ഡോളറിലേറെ വരുമാനമുള്ള ദമ്പതികക്കും ഇനി മുതല്‍ നികുതി നല്‍കേണ്ടി വരും. 24 ബില്യണ്‍ ഡോളറിന്‍റെ പ്രതിരോധവകുപ്പിനുള്ള ചെലവ് വെട്ടിക്കുറയ്ക്കാനും തീരുമാനിച്ചിട്ടുണ്ട്.