ഗഡ്കരി ഒഴിയണമെന്നാവശ്യത്തില്‍ ഉറച്ച് രാംജത് മലാനി

പുതിയ അദ്ധ്യക്ഷനെയോ ഇടക്കാല അദ്ധ്യക്ഷനെയോ നിയമിക്കാനുള്ള തീരുമാനം പാര്‍ലമെന്‍റ് സമ്മേളനത്തിനു മുമ്പ്......

നിതിന്‍ ഗഡ്കരി രാജിവയ്ക്കണമെന്ന ആവശ്യം പാര്‍ട്ടി എം പി രാംജത് മലാനി ആവര്‍ത്തിച്ചു. നിതിന്‍ ഗഡ്കരിക്കെതിരെ ഇന്നലെ നടന്ന നീക്കം ആര്‍ എസ് എസിനെതിരെയുള്ള നീക്കമായിയിരുന്നു എന്നാണ് ബി ജെ പിയിലെ ഒരു വിഭാഗം നേതാക്കളുടെ ആരോപണം. നിതിന്‍ ഗഡ്കരിക്കെതിരെ രംഗത്തെത്തിയ രാം ജത് മലാനിക്കു പിന്നില്‍ ബി ജെ പിയിലെ ഒരു വിഭാഗം ഉണ്ടെന്ന് ആര്‍ എസ് എസ് നേതൃത്വത്തിന് നേരത്തെ സംശയമുണ്ടായിരുന്നു. ഇത് ശരിവക്കുന്ന ചില തെളിവുകളാണ് ഇന്നലെ പുറത്തുവന്നത്. ജസ്വന്ത് സിംഗ് ,യശ്വന്ത് സിന്‍ഹ, ശത്രുഘ്നന്‍ സിന്‍ഹ എന്നിവര്‍ തന്നെ പിന്തുണയ്ക്കുന്നു എന്ന് ജത് മലാനി തന്നെ വെളിപ്പെടുത്തി.

എല്‍ കെ അദ്വാനിയുടെ പരോക്ഷ പിന്തുണ ഈ നീക്കത്തിന് കിട്ടുകയും ചെയ്തു. ഇത് ആര്‍ എസ് വിരുദ്ധ നീക്കമായി ചിത്രീകരിക്കുന്നതില്‍ ഗഡ്കരി വിജയിച്ചു. കോര്‍പ്പറേറ്റ് രംഗവുമായും ആര്‍ എസ് എസുമായും ഒരു പോലെ ബന്ധമുള്ള ഗുരുമൂര്‍ത്തിയുടെ സഹായം ഇതിന് ഗഡ്കരിക്ക് കിട്ടി. ആര്‍ എസ് എസ് നടത്തിയ ഈ ഇടപെടലില്‍ അദ്വാനി ഏറെ അസ്വസ്ഥനാണെന്നാണ് സൂചന. എന്നാല്‍ നരേന്ദ്ര മോ‍ഡിക്ക് ഈ നീക്കവുമായി ബന്ധമില്ലായിരുന്നു എന്ന് ആര്‍ എസ് എസ് വൃത്തങ്ങള്‍ പറഞ്ഞു. അരുണ്‍ ജയ്റ്റ്ലി ഗഡ്കരിയെ പിന്തുണച്ചത് ഇതിന്‍റെ സൂചനയാണ്.

എന്നാല്‍ ഗഡ്കരിയെ ഒരു വട്ടം കൂടി അദ്ധ്യക്ഷനാക്കാനുള്ള നീക്കം ആര്‍ എസ് എസ് ഉപേക്ഷിച്ചേക്കും. പുതിയ അദ്ധ്യക്ഷനെയോ ഇടക്കാല അദ്ധ്യക്ഷനെയോ നിയമിക്കാനുള്ള തീരുമാനം പാര്‍ലമെന്‍റ് സമ്മേളനത്തിനുമുമ്പ് ഉണ്ടാകണം എന്നാണ് ഗഡ്കരി വിരുദ്ധ നേതാക്കളുടെ നിലപാട്. ഗഡ്കരി തുടരുന്നത് അഴിമതിക്കെതിരെയുള്ള ബി ജെ പിയുടെ പോരാട്ടം ദുര്‍ബലപ്പെടുത്തുമെന്ന് രാംജത് മലാനി ഇന്ന് ആവര്‍ത്തിച്ചു. പരസ്യ പ്രസ്താവനകള്‍ പാര്‍ട്ടി വിലക്കിയിട്ടുള്ളത് ചൂണ്ടിക്കാണിച്ചപ്പോള്‍ തന്നെ ധൈര്യമുണ്ടെങ്കില്‍ ബി ജെ പി പുറത്താക്കട്ടെ എന്ന് രാംജത് മലാനി പ്രതികരിച്ചു.