കോണ്‍ഗ്രസിന് താത്കാലിക ആശ്വാസം

എന്നാല്‍ തന്‍റെ വിമര്‍ശനം കൊള്ളേണ്ട ഇടത്തെല്ലാം കൊണ്ടെന്ന് ബോധ്യപ്പെട്ട ശേഷമാണ് ആന്‍റണി അതിന്....

നിലപാടില്‍ വിട്ടുവീഴ്ച്ചയില്ലാതെ വിമര്‍ശനങ്ങളെ എ കെ ആന്‍റണി വിശദീകരിച്ചതോടെ കേരളത്തിലെ സര്‍ക്കാരിനും കോണ്‍ഗ്രസിനും താത്കാലിക ആശ്വാസമായിരിക്കുകയാണ്. എന്നാല്‍ വിവാദമുണ്ടാക്കിയ കനലുകളില്‍നിന്ന് വരും ദിവസങ്ങളിലും തീ ഉയരും എന്നുറപ്പാണ്. കാസര്‍കോട്ടെ എച്ച് എ എല്ല് യൂണിറ്റിന്‍റെ ഉദ്ഘാടന ചടങ്ങില്‍ പ്രതീക്ഷിച്ചത് തന്നെയാണ് സംഭവിച്ചത്. നിലപാടില്‍ മയം വരുത്താതെ എ കെ ആന്‍റണി ബ്രഹ്മോസിലെ വിവാദ പ്രസംഗത്തിന് തൃപ്തികരമായ വ്യാഖ്യാനങ്ങള്‍നല്‍കി. ബ്രഹ്മോസിനെ തകര്‍ത്താല്‍കേരളത്തില്‍പൊതുമേഖലാ വ്യവസായങ്ങള്‍എങ്ങനെ വരുമെന്ന് ചോദിച്ച് ആന്‍റണി തന്‍റെ പ്രകോപനത്തിന് കാരണം ബ്രഹ്മോസിലെ പ്രശ്നങ്ങളായിരുന്നെന്ന് വരുത്തി. ബ്രഹ്മോസ് പ്രസംഗം തെറ്റായി വ്യാഖ്യാനിച്ചെന്ന് കുറ്റപ്പെടുത്തി.

കേരളത്തിലെ മൊത്തം വ്യവസായ അനതരീക്ഷത്തെക്കുറിച്ചാണ് താന്‍ഉദ്ദേശിച്ചിരുന്നതെന്നും അതിന് ഇനി കൂടുതല്‍വ്യാഖ്യാനങ്ങള്‍നല്‍കേണ്ട എന്നും പറഞ്ഞതിലൂടെ പ്രശ്നങ്ങള്‍ ഇവിടെ അവസാനിപ്പിക്കണമെന്ന സന്ദേശം നല്‍കി. വികസനത്തില്‍ രാഷ്ട്രീയം വേണ്ടെന്ന് പറഞ്ഞ എ കെ ആന്‍റണി കാസര്‍കോട്ടും കലവറയില്ലാതെ എളമരം കരീമിനെ പ്രശംസിച്ചു .തെക്ക് പറഞ്ഞതിന് വടക്കേയറ്റത്ത് വ്യാഖ്യാനം നല്‍കി,എച്ച് എ എല്ലിന്‍റെ രണ്ടാം ഘട്ട വികസനവും കാസര്‍കോട്ടിന് പ്രഖ്യാപിച്ച് ആന്‍റണി മടങ്ങുമ്പോള്‍ ആശ്വാ സമാകുന്നത് കോണ്‍ഗ്രസിന് പ്രത്യേകിച്ച് മുഖ്യമന്ത്രി ഉമ്മന്‍ചാണ്ടിക്കാണ്. എന്നാല്‍ തന്‍റെ വിമര്‍ശനം കൊള്ളേണ്ട ഇടത്തെല്ലാം കൊണ്ടെന്ന് ബോധ്യപ്പെട്ട ശേഷമാണ് ആന്‍റണി അതിന് വിശദീകരണവുമായി രംഗത്തെത്തിയതെന്നത് ശ്രദ്ധേയമാണ്.

മഴ തീര്‍ന്നിട്ടും മരം പെയ്യുന്നു എന്നാണ് തന്‍റെ വിര്‍ശനത്തിന് ശേഷം വന്ന പ്രസ്താവനകളെ ആന്‍റണി ഇന്ന് വിശേഷിപ്പിച്ചത്. മരം പെയ്യുന്നത് ഉടനെ അവസാനിക്കില്ല എന്നുറപ്പാണ്.എ കെ ആന്‍റണിയെ പ്രതിരോധിക്കാന്‍ ഘടകകക്ഷി നേതാക്കളെ രംഗത്തിറക്കിയതില്‍ കോണ്‍ഗ്രസിലെ ഒരു വിഭാഗം അസ്വസ്ഥരാണ്.ആന്‍റണിയോടുള്ള ലീഗിന്‍റെ പ്രതികരണം മിതമായിരുന്നെങ്കില്‍ ചീഫ് വിപ്പിന്‍റേത് കടന്നാക്രമണമായിരുന്നു. ആക്രമണം സൃഷ്ടിച്ച മുറിവുകള്‍ അങ്ങനെയൊന്നും ഉണങ്ങില്ല എന്നാണ് കോണ്‍ഗ്രസ് നേതാക്കള്‍നല്‍കുന്ന സൂചനകള്‍.