ബാല്‍ താക്കറെയ്ക്ക് അന്ത്യാജ്ഞലി

ശിവ്സേനാ തലവനായിരുന്ന ബാല്‍ താക്കറെയുടെ സംസ്ക്കാരം മുംബൈയില്‍ നടന്നു. ആയിരകണക്കിന് ആരാധകരെ

മുംബൈ: ശിവ്സേനാ തലവനായിരുന്ന ബാല്‍ താക്കറെയുടെ സംസ്ക്കാരം മുംബൈയില്‍ നടന്നു. ആയിരകണക്കിന് ആരാധകരെ സാക്ഷിനിര്‍ത്തി മുംബൈയിലെ ശിവജി പാര്‍ക്കിലായിരുന്നു സംസ്കാര ചടങ്ങുകള്‍ നടന്നത്. നിരവധി പ്രമുഖര്‍ അന്ത്യോപചാരമര്‍പ്പിച്ചു. മകനും ശിവസേന തലവനുമായ ഉദ്ദവ് താക്കറെയാണ് പിതാവിന്‍റെ ചിതയ്ക്ക് തീകൊളുത്തിയത്. പൂര്‍ണ്ണ സംസ്ഥാന ബഹുമതിയോടെയായിരുന്നു ചടങ്ങുകള്‍ നടന്നത്. എന്‍ എം എസ് നേതാവും മരുമകനുമായ രാജ് താക്കറെയും സംസ്കാര ചടങ്ങില്‍ സന്നിഹിതനായിരുന്നു.

കേന്ദ്ര കൃഷിമന്ത്രി ശരദ് പവാര്‍, ബി ജെ പി നേതാവ് എല്‍ കെ അദ്വാനി, മഹാരാഷ്ട്ര മുഖ്യമന്ത്രി പൃഥ്വിരാജ് ചവാന്‍, മുകേഷ് അംബാനി, അമിതാഭ് ബച്ചാന്‍, സഞ്ജയ് ദത്ത് തുടങ്ങിയവരുള്‍പ്പടെ നിരവധി പ്രമുഖര്‍ സംസ്കാര ചടങ്ങില്‍ പങ്കെടുത്തു. ഞായറാഴ്ച രാവിലെ താക്കറെയുടെ വസതിയായ മാതോ ശ്രീയില്‍ നിന്ന് ആരംഭിച്ച വിലാപയാത്രയില്‍ ആയിരങ്ങളാണ് പ്രിയനേതാവിന് അന്ത്യാജ്ഞലി അര്‍പ്പിച്ചത്.

കഴിഞ്ഞദിവസം മുംബൈയിലെ വസതിയില്‍ വെച്ചായിരുന്നു താക്കറെയുടെ അന്ത്യം സംഭവിച്ചത്. ഹൃദയസ്തംഭനം മൂലമായിരുന്നു താക്കറെയുടെ മരണം. വാര്‍ധക്യസഹജമായ അസുഖങ്ങളെ തുടര്‍ന്ന് കഴിഞ്ഞ ആറു മാസത്തോളമായി മുംബൈയിലെ ലീലാവതി ആശുപത്രിയിലും വീട്ടിലുമായി നിരന്തര ചികിത്സയിലായിരുന്നു താക്കറെ. പതിവിനു വിപരീതമായി ദസറയോടനുബന്ധിച്ചുള്ള റാലിയില്‍ ചരിത്രത്തിലാദ്യമായി താക്കറെ വിട്ടു നിന്നതോടെയാണ് അദ്ദേഹത്തിന്‍റെ ആരോഗ്യ സ്ഥിതി സംബന്ധിച്ച് ആശങ്കകള്‍ ഉയര്‍ന്നത്. വീഡിയോ കോണ്‍ഫറന്‍സിലൂടെയാണ് താക്കറെ ഇത്തവണത്തെ ദസറ റാലിയെ അതിസംബോധന ചെയ്തത്.

Malayalam latest news, current news malayalam, asianet news, Bal Thackeray