ഇന്ത്യ ഏഴിന് 273; സച്ചിന് 76

കൊല്‍ക്കത്ത: ഇംഗ്ലണ്ടിനെതിരായ മൂന്നാം ക്രിക്കറ്റ് ടെസ്റ്റില്‍ ഒന്നാം ദിവസം ബാറ്റിംഗ് അവസാനിപ്പിക്കുമ്പോള്‍ ഇന്ത്യ ഏഴ് വിക്കറ്റ്...

കൊല്‍ക്കത്ത: ഇംഗ്ലണ്ടിനെതിരായ മൂന്നാം ക്രിക്കറ്റ് ടെസ്റ്റില്‍ ഒന്നാം ദിവസം ബാറ്റിംഗ് അവസാനിപ്പിക്കുമ്പോള്‍ ഇന്ത്യ ഏഴ് വിക്കറ്റ് നഷ്ടത്തില്‍ 273 റണ്‍സ് എന്ന നിലയില്‍. 22 റണ്‍സെടുത്ത് ധോണിയും റണ്‍സൊന്നുമെടുക്കാതെ സഹീര്‍ഖാനുമാണ് ക്രീസില്‍.

ഇന്ത്യക്ക് വേണ്ടി സച്ചിനും ഗംഭീറുമാണ് ഇന്ന് മോശമല്ലാതെ രീതിയില്‍ ബാറ്റ് ചെയ്തത്.  തുടക്കത്തില്‍ താളം കണ്ടെത്താന്‍ പാടുപെട്ട സച്ചിന്‍ പതുക്കെയാണ് തുടങ്ങിയതെങ്കിലും പിന്നീട് പതിവുതാളത്തിലെത്തിയത് ആരാധകര്‍ക്ക് പ്രതീക്ഷ നല്‍കിയിരുന്നു. പക്ഷേ സെഞ്ചുറിയിലൂടെ വിമര്‍ശനങ്ങള്‍ക്ക് സച്ചിന്‍ മറുപടി പറയുമെന്ന ആരാധകരുടെ പ്രതീക്ഷ അസ്ഥാനത്തായി. 155 പന്തില്‍ 13 ബൗണ്ടറികളുള്‍പ്പടെ 76 റണ്‍സെടുത്ത് സച്ചിന്‍ പുറത്തായി. ഗംഭീര്‍ 60 റണ്‍സെടുത്തു. പനേസറിന്‍റെ പന്തില്‍ ട്രോട്ട് പിടിച്ചാണ് ഗംഭീര്‍ പുറത്തായത്. 23 റണ്‍സെടുത്ത സെവാഗ് ഗംഭീറുമായുള്ള ധരാണപ്പിശകില്‍ റണ്ണൗട്ടായപ്പോള്‍ ചേതേശ്വര്‍ പൂജാരയെ(16) മോണ്ടി പനേസര്‍ ക്ലീന്‍ ബൗള്‍ഡാക്കി. വിരാട് കൊഹ്ലി(6) ആന്‍ഡേഴ്സന്റെ പന്തില്‍ സ്ലിപ്പില്‍ സ്വാന് ക്യാച്ച് നല്‍കി മടങ്ങി.  32 റണ്‍സെടുത്ത യുവരാജിനെ സ്വാന്‍ കുക്കിന്റെ കൈകളിലെത്തിച്ചു. 21 റണ്‍സെടുത്ത അശ്വിനെ ആന്‍ഡേഴ്സണ്‍ പുറത്താക്കി.

മുംബൈ ടെസ്റ്റ് കളിച്ച ടീമില്‍ ഒരു മാറ്റവുമായാണ് ഇന്ത്യ ഇന്ന് ഇറങ്ങിയത്. ഹര്‍ഭജന്‍ സിംഗിന് പകരം ഇഷാന്ത് ശര്‍മയെ ഇന്ത്യ അന്തിമ ഇലവനില്‍ ഉള്‍പ്പെടുത്തി. മുംബൈ ടെസ്റ്റ് ജയിച്ച ടീമില്‍ ഇംഗ്ലണ്ട് രണ്ടു മാറ്റങ്ങള്‍ വരുത്തി. ജോണി ബെയ്ര്‍സറ്റോയ്ക്കു പകരം ഇയാന്‍ ബെല്‍ ടീമില്‍ തിരിച്ചെത്തിയപ്പോള്‍ സ്റ്റുവര്‍ട്ട് ബ്രോഡിനു പകരം സ്റ്റീവന്‍ ഫിന്നും ടീമിലെത്തി. പരമ്പരയിലെ ആദ്യ ടെസ്റ്റില്‍ ഇന്ത്യ ജയിച്ചപ്പോള്‍ രണ്ടാം ടെസ്റ്റ് ജയിച്ച ഇംഗ്ലണ്ട് പരമ്പരയില്‍ സമനില പിടിക്കുകയായിരുന്നു.