ഇന്ത്യന്‍ ടീമിന് ദ്രാവിഡിന്റെ രൂക്ഷ വിമര്‍ശനം

ഇന്ത്യന്‍ കളിക്കാരുടെ പ്രതിഭയെയും കഴിവിനെയും ചോദ്യം ചെയ്ത ദ്രാവിഡ് രാജ്യത്തെ പ്രിതനിധീകരിക്കാനുള്ള അവരുടെ യോഗ്യതയെക്കുറിച്ചും....

ലണ്ടന്‍: ഇംഗ്ലണ്ടിനെതിരായ ടെസ്റ്റ് പരമ്പരയില്‍ സമ്പൂര്‍ണ പരാജയമായ ഇന്ത്യന്‍ താരങ്ങള്‍ക്കെതിരെ രൂക്ഷ വിമര്‍ശനവുമായി മുന്‍ ഇന്ത്യന്‍ ക്രിക്കറ്റ് താരം രാഹുല്‍ ദ്രാവിഡ് രംഗത്ത്. ഇന്ത്യന്‍ കളിക്കാരുടെ പ്രതിഭയെയും കഴിവിനെയും ചോദ്യം ചെയ്ത ദ്രാവിഡ് രാജ്യത്തെ പ്രിതനിധീകരിക്കാനുള്ള അവരുടെ യോഗ്യതയെക്കുറിച്ചും സംശയം പ്രകടിപ്പിച്ചു, ഇന്ത്യന്‍ ടീമിന്റെ ദയനീയ പരാജയങ്ങള്‍ക്ക് പണമൊഴുകുന്ന ഐപിഎല്ലിനെയും ടെസ്റ്റ് ക്രിക്കറ്റിനോടുള്ള കളിക്കാരുടെ സമീപനത്തെയും മറ്റും കുറ്റം പറയുന്നവര്‍ യഥാര്‍ഥത്തില്‍ ചിന്തിക്കേണ്ടത് ഇന്ത്യ കളിക്കാര്‍ക്ക് ഇംഗ്ലണ്ടിനെപ്പോലൊരു മികച്ച ടീമിനെ നേരിടാനുള്ള പ്രതിഭയും കഴിവും ഉണ്ടോ എന്നാണെന്നും ബിബിസിക്ക് നല്‍കിയ അഭിമുഖത്തില്‍ ദ്രാവിഡ് തുറന്നടിച്ചു.

ഇന്ത്യന്‍ ടീം തോല്‍ക്കുന്നതിലല്ല തോല്‍ക്കുന്ന രീതിയിലാണ് ഇന്ത്യന്‍ ആരാധകരെപ്പോലെ തനിക്കും നിരാശയുള്ളതെന്നും ദ്രാവിഡ് പറഞ്ഞു. പരമ്പരയിലെ ആദ്യ മൂന്ന് മത്സരങ്ങളിലും ടോസ് ലഭിക്കുകയും അനുകൂലമായ പിച്ചൊരുക്കുകയുമെല്ലാം ചെയ്തിട്ടും ആദ്യ ടെസ്റ്റൊഴികെയുള്ള രണ്ടു ടെസ്റ്റിലും ഒരു പോരാട്ടം പോലുമില്ലാതെ ഇന്ത്യ തോറ്റു. യഥാര്‍ഥത്തില്‍ ഇന്ത്യന്‍ ടീം നേരിടുന്ന വെല്ലുവിളികളുടെ നേര്‍ക്ക് ഇംഗ്ലണ്ട് കണ്ണാടി തിരിച്ചുവെക്കുകയായിരുന്നു എന്നതാണ് സത്യം. വിജയം നേടുന്ന ടീമുകളില്‍ എപ്പോഴും ആവശ്യമായ സമയത്ത് മികച്ച ഫോമിലേക്ക് ഉയരുന്ന ഒരുസംഘം കളിക്കാരുണ്ടാകും. ഇന്ത്യക്കത് ഇല്ലാതെപ്പോയി. എ ടീമുകളെക്കൊണ്ട് കൂടുതല്‍ വിദേശ പര്യടനങ്ങള്‍ നടത്തുകയും ക്രിക്കറ്റ് അക്കാദമി സമ്പ്രദായം ഫലപ്രദമായി നടപ്പാക്കുകയുമാണ് ഇത് നേരിടാനുള്ള ഏക പോംവഴി. ഇംക്കാര്യത്തില്‍ ഇംഗ്ലണ്ടില്‍ നിന്ന് ഇന്ത്യക്ക് കണ്ടുപഠിക്കാനേറെയുണ്ട്.

സീനിയര്‍ താരങ്ങളുടെ വിടവാങ്ങലോടെ ഇന്ത്യന്‍ ടീം പരിണാമ ഘട്ടിത്തിലാണെങ്കിലും ഇത്തരം പദ്ധതികളിലൂടെ കഴിവും സാങ്കേത്തികത്തികവും സര്‍വോപരി ടെസ്റ്റ് ക്രിക്കറ്റ് കളിക്കാന്‍ ആഗ്രഹവുമുള്ള കളിക്കാരെ കണ്ടെത്താനാകും. സ്പിന്‍ ആണ് എക്കാലത്തും ഇന്ത്യയുടെ ശക്തി. എന്നാല്‍ ടെസ്റ്റ് പരമ്പരയില്‍ ഇന്ത്യന്‍ സ്പിന്നര്‍മാരായ ആര്‍ അശ്വിനും പ്രഗ്യാന്‍ ഓജയും തീര്‍ത്തും നിരാശപ്പെടുത്തിക്കളഞ്ഞു. ഇത് ആശങ്കയുണ്ടാക്കുന്ന കാര്യമാണ്. ഇന്ത്യന്‍ ടീം അംഗങ്ങളുംട ശാരീരികക്ഷമതയെക്കുറിച്ചും സംശയം പ്രകടിപ്പിച്ച ദ്രാവിഡ് ഇതൊന്നും തോല്‍വിക്ക് ന്യായീകരണമല്ലെന്നും തുറന്നടിച്ചു.

ഇന്ത്യന്‍ താരങ്ങളുടെ ഫീല്‍ഡിംഗും ശാരീരികക്ഷമതയും തീര്‍ത്തും നിരാശപ്പെടുത്തുന്നതായിരുന്നു. ഒരു കളിക്കാരനില്‍ നിന്ന് ഇത്ര റണ്‍സ് വേണമെന്ന് ആവശ്യപ്പെടാന്‍ കഴിയില്ല. എന്നാല്‍ കളിയോടുള്ള ആത്മാര്‍ഥതയും ഉത്തരവാദിവുമെങ്കിലും ആവശ്യപ്പെടാന്‍ കഴിയണം. നാഗ്പൂര്‍ ടെസ്റ്റില്‍ ജയിച്ച് ഇന്ത്യ പരമ്പര സമനിലയാക്കാനുള്ള എല്ലാ സാധ്യതയുമുണ്ടെങ്കിലും ഇന്ത്യന്‍ ക്രിക്കറ്റിനെ രക്ഷപ്പെടുത്താന്‍ ദാര്‍ഘകാ പദ്ധതികളാണ് വേണ്ടതെന്നും വ്യക്തമാക്കി.