സമനില തെറ്റിയില്ല; ചരിത്രം കുറിച്ച് ഇംഗ്ലണ്ടിന് പരമ്പര

ഇരുപത്തിയെട്ടു വര്‍ഷത്തിനുശേഷം ഇന്ത്യയിലൊരു ടെസ്റ്റ് പരമ്പരയെന്ന ചരിത്ര നേട്ടത്തിനു മുന്നില്‍ ഇംഗ്ലണ്ടിന്...

നാഗ്പൂര്‍:: ഇരുപത്തിയെട്ടു വര്‍ഷത്തിനുശേഷം ഇന്ത്യയിലൊരു ടെസ്റ്റ് പരമ്പരയെന്ന ചരിത്ര നേട്ടത്തിനു മുന്നില്‍ ഇംഗ്ലണ്ടിന് സമനില തെറ്റിയില്ല. നാഗ്പൂര്‍ ക്രിക്കറ്റ് ടെസ്റ്റില്‍ സമനില പിടിച്ച് ഇന്ത്യക്കെതിരായ നാലു മത്സര പരമ്പര ഇംഗ്ലണ്ട് 2-1ന് സ്വന്തമാക്കി. ഇംഗ്ലണ്ടിലേറ്റ പരാജയത്തിന് പ്രതികാരം ചെയ്യാനിറങ്ങിയ ഇന്ത്യയ്ക്ക് സ്വന്തം നാട്ടിലും പരമ്പര അടിയറവെച്ചതിന്റെ നാണക്കേട് മാത്രം ബാക്കിയായി. കഴിഞ്ഞ എട്ടുവര്‍ഷത്തിനിടെ ആദ്യമായാണ് ഇന്ത്യ നാട്ടിലൊരു ടെസ്റ്റ് പരമ്പര തോല്‍ക്കുന്നത്. ആദ്യ ടെസ്റ്റില്‍ തോറ്റശേഷമായിരുന്നു ഇംഗ്ലണ്ടിന്റെ തിരിച്ചുവരവ്. 1984-85നുശേഷം ആദ്യ ടെസ്റ്റ് തോറ്റ ഒരു ടീം ഇന്ത്യയില്‍ പരമ്പര സ്വന്തമാക്കുന്നതും ഇതാദ്യമാണ്. സ്കോര്‍: ഇംഗ്ലണ്ട്: 330, 352/4. ഇന്ത്യ: 326/9.

161/3 എന്ന നിലയില്‍ അവസാനദിവസം ക്രീസിലെത്തിയ ഇംഗ്ലണ്ടിന്റെ ശേഷിക്കുന്ന വീക്കറ്റുകള്‍ വേഗം വീഴ്ത്തി മാനം കാക്കാമെന്ന ഇന്ത്യന്‍ സ്വപ്നങ്ങള്‍ തച്ചുടച്ച് ജൊനാഥന്‍ ട്രോട്ടും((143) ഇയാന്‍ ബെല്ലും(116 നോട്ടൗട്ട്) പ്രതിരോധത്തിന്റെ ഉരുക്കു കോട്ട കെട്ടിയപ്പോള്‍ ഇന്ത്യന്‍ ബൗളര്‍മാര്‍ എന്തിനോ വേണ്ടി പന്തെറിഞ്ഞു കൊണ്ടിരുന്നു. ഒടുവില്‍ സമനില ഉറപ്പാക്കി ട്രോട്ട് മടങ്ങിയെങ്കിലും അരങ്ങേറ്റക്കാരന്‍ ജോ റൂട്ട് (20) സമനില തെറ്റാതെ ബെല്ലിന് കൂട്ടായി നിന്നു. അവസാന ദിനം ഒരു വിക്കറ്റ് മാത്രമാണ് ഇന്ത്യക്ക് വീഴ്ത്താനായത്.

മത്സരത്തില്‍ ഇന്ത്യയുടെ നാലു നിര്‍ണായക വിക്കറ്റുകള്‍ വീഴ്ത്തിയ ജെയിംസ് ആന്‍ഡേഴ്സണാണ് കളിയിലെ കേമന്‍. ഇംഗ്ലണ്ട് നായകന്‍ അലിസ്റ്റര്‍ കുക്കാണ് പരമ്പരയുടെ താരം. പരമ്പരയില്‍ ഇന്ത്യയും ഇംഗ്ലണ്ടും തമ്മിലുള്ള പ്രധാന വ്യത്യാസം ആന്‍ഡേഴ്സന്റെ ബൗളിംഗായിരുന്നുവെന്ന് മത്സരശേഷം ഇന്ത്യന്‍ നായകന്‍ ധോണി പറഞ്ഞു. ഈ പിച്ചില്‍ നിന്ന് സമനിലയല്ലാതെ മറ്റൊന്നും പ്രതീക്ഷിച്ചിരുന്നില്ലെന്നും ധോണി വ്യക്തമാക്കി. ബാറ്റിംഗും ബൗളിംഗും ഒരു പോലെ പരാജയപ്പെട്ടതാണ് ഇന്ത്യക്ക് തിരിച്ചടിയായത്.എങ്കിലും ഗംഭീര്‍ ഫോമിലേക്ക് മടങ്ങിയെത്തിയത് ഇന്ത്യക്ക് ആശ്വാസമാണെന്നും ധോണി പറഞ്ഞു.